Жирэмсэн болсноос хойш төрөх хүртэл хугацааг долоо долоо хоногоор тооцож явдаг.  Төрөх хүртэл жирэмсний хугацаа ойролцоогоор 40 долоо хоног буюу 9 сар 1 хоног байдаг. Тэгвэл жирэмсний хоёр дахь долоо хоногт чухам юу болдог гэдгээс эхлээд долоо хоног бүрийн өөрчлөлтийн сонирхолтой мэдээллийг танд хүргэе.  

Жирэмсэн болсны дараах хоёр дахь 7 хоног

Та одоогоор жирэмсэн биш. Гэхдээ энэ долоо хоногт та жирэмсэн болбол хоёр 7 хоногтой жирэмсэн гэж тооцогдоно. Эмнэлгийн байгууллагууд таны төрөх хугацааг сүүлийн сарын тэмдгийн эхний өдрөөр тооцдог тул сарын тэмдгийн эхний өдөр нь жирэмсний эхний өдөр гэж үздэг гэсэн үг.  Өндгөвчөөс өндгөн эс гарах хугацаа мөчлөгийн хоёр дахь долоо хоног орчимд тохиолддог учраас жирийн тооцоогоор үр тогтолт жирэмсний хоёр дахь долоо хоногт явагддаг гэж үздэг.

Жирэмслэхэд хамгийн таатай үе

Өндгөн эс боловсрох өдрөөс өмнөх 3 өдөр хамгийн үр тогтох магадлал өндөртэй байдаг.

Өндгөн эс боловсорч байгаа эсэхийг илтгэх шинж тэмдгүүдэд:

• Суурь биеийн температурын өөрчлөлт
• Хөхний эмзэглэл
• Хөнгөн базлалт
• Үтрээний ялгадас нэмэгдэх зэрэг багтана.

2 дахь долоо хоногт таны хүүхдийн хөгжил

Бие чинь шинэ амьдралыг бүтээхэд бэлтгэгдэж байна. Сүүлийн хэд хоногийн турш эстроген болон прогестерон даавар нэмэгдсэнээр умайн салст давхарга зузаарч, үр тогтсон өндгөн эсийг хүлээн авахад бэлэн болж эхэлдэг. Үүнтэй зэрэгцээд өндгөвчинд байрлах жижиг шингэнтэй уутанцрууд болох фолликул дотор өндгөн эсүүд “боловсорч” эхэлнэ.

Өндгөн эс гадагшиллаа

Өндгөн эс гадагшилсны дараа боловсорсон өндгөн эс фолликул дотроос “тэсэрч” гараад өндгөвчнөөс фаллопийн гуурс руу шилждэг. Өндгөн эс гадагшлах нь таны мөчлөгийн яг голоор тохиолдоно гэсэн ойлголт заавал үнэн биш. Жишээлбэл, 28 хоногийн мөчлөгтэй эмэгтэйчүүдийн хувьд өндгөн эс гадагшлах нь 9–21 дахь өдрийн алинд ч тохиолдож болдог.

Үр тогтолт

Сперм өндгөн эстэй учрах нь

Өндгөн эс гадагшилсны дараах 24 цагийн дотор нэг эрүүл, хөдөлгөөнт эр бэлгийн эс үтрээнээс эхлэн умайн хүзүү, умайгаар дамжин фаллопийн гуурст хүрч, өндгөн эсийн бүрхүүлийг нэвтэлж  чадвал үр тогтолт явагдана. Нэг удаагийн үрийн шингэнд ойролцоогоор 250 сая сперм агуулагддаг боловч ердөө 400 орчим нь 10 цаг үргэлжлэх энэ урт аяллыг туулж өндгөн эст хүрдэг. Гэхдээ ихэнх тохиолдолд зөвхөн нэг сперм л өндгөн эсийн хамгаалалтын бүрхүүлийг нэвтэлж чаддаг.

Генүүдийн нэгдэл

Үр тогтсон даруйдаа дараагийн 10–30 цагийн дотор спермийн цөм өндгөн эсийн цөмтэй нийлж, генетикийн мэдээллээ хослуулна.

• Хэрэв сперм Y хромосом авчирсан бол таны хүүхэд хүү болно.
• Хэрэв X хромосом авчирсан бол охин болно.

Үр тогтсон энэ эсийг зигот гэж нэрлэдэг.

Бэхлэгдэх (Имплантаци)

Зигот фаллопийн гуурсаас умай руу шилжихдээ 3–4 хоног зарцуулдаг бөгөөд энэ хугацаанд өөртэйгөө ижил 100 гаруй эс болж хуваагдана. Умайд хүрмэгц үүнийг бластоцист гэж нэрлэнэ. Хоёр хоногийн дараа бластоцист умайн зузаарсан салст давхаргад зөөлөн шигдэж, эндээсээ цааш ургаж, хуваагдсаар жирэмсний эхний шат үргэлжилдэг.

2-р долоо хоногт илэрч болох жирэмсний шинжүүд

1. Умайн хүзүүний “тослог” ялгадас

Умайн хүзүүний салс гэдэг нь заримдаа дотуур хувцсан дээр харагддаг үтрээний ялгадас юм. Өндгөн эс гадагшлах өдрүүдэд энэ ялгадас тунгалаг, гулгамтгай, сунадаг байдалтай болдог —  өндөгний цагаан шиг.

2. Хөнгөн базлалт

Зарим эмэгтэйчүүд өндгөвчлөх үед гэдсэндээ хөнгөн базлах мэт мэдрэмж, эсвэл нэг тал руугаа нуруу өвдөх шинж илэрдэг. Үүнийг миттельшмэрц (герман хэлээр “дунд үеийн өвдөлт”) гэж нэрлэдэг.

3. Бэлгийн дуршил нэмэгдэх

Та үр тогтох боломжтой үедээ ойртох тусам бэлгийн дур хүсэл нэмэгдэх нь хэвийн. Мөн таны биеийн үнэр эрчүүдэд илүү тааламжтай санагдаж болдог.

4. Үнэрлэх мэдрэхүй хурц болох

Зарим судалгаагаар өндгөвчлөх үед эмэгтэй хүний үнэрлэх мэдрэмж хүчтэй болж, тэр дундаа эр хүний феромоны үнэрт илүү мэдрэг болдог аж.

5. Хөхний эмзэглэл

Өндгөвчлөлтэй холбоотой дааврын өөрчлөлтүүдээс шалтгаалж хөх тань жаахан хөндүүртэй мэдрэг байж болно. Жирэмсний долоо хоногууд нэмэгдэх тусам хөхөнд өөрчлөлт орж байдаг.

6. Умайн хүзүүний өөрчлөлт

Өндгөн эс гадагшлах үед умайн хүзүү:

• Зөөлөн
• Үтрээний гүн рүү илүү дээш, хол байрлалд шилжинэ
• Илүү чийглэг
• Бага зэрэг нээлттэй болдог. Та хүсвэл өөрийн гараараа умайн хүзүүгээ шалгаж мэдэрч болох ч өөрчлөлтөө ялгаж сургахын тулд өдөр бүр шалгах шаардлагатай болдог.

7. Суурь биеийн температур (BBT) нэмэгдэх

Та тусгай термометр ашиглан өглөө бүр суурь биеийн температур хэмжиж болно. Өндгөн эс гадагшилсны дараагийн өдөр температур тань бага зэрэг нэмэгдэж, дараагийн сарын тэмдэг иртэл өндөр хэвээр хадгалагддаг.

Хоёр долоо хоногтой жирэмсэн эмэгтэй юу анхаарах ёстой вэ

Витаминуудаа уугаарай

Хэрэв та витамин ууж эхлээгүй бол өдөр бүр дор хаяж 400 микрограмм (мкг) фолийн хүчил агуулсан жирэмсний витамин ууна уу. Жирэмсний витамин нь таны болон хүүхдийнхээ эрүүл мэндэд чухал шим тэжээл өгнө.  Тухайлбал төмөр, витамин D, кальцийг өгдөг. Фолийн хүчил нь хүүхдийн зарим төрлийн ургийн гаж хөгжлийн эрсдэлийг бууруулдаг бөгөөд таны хүүхдийн мэдрэлийн хоолойн хөгжил эхлэхэд (жирэмсний хамгийн эрт үе) хамгийн чухал юм.

Эмчид үзүүлээрэй

Хүүхэд төрүүлэхээс өмнөх үзлэгт очих нь таны биеийг хамгийн тохиромжтой нөхцөлд бэлдэнэ. Аль нэг эм, нэмэлт тэжээлээ зогсоох хэрэгтэй эсэхээ мэдэх боломжтой. Мөн жирэмслэлт, эцэг эхийн талаархи санаа зовнилоо ярилцах боломж гарна.

Цусны шинжилгээ авч үзэхийг бодоорой

Та болон хоё тань генийн шалтгаант өвчин тээж буй эсэхээ мэдэх генетикийн шинжилгээ хийлгэж болно. Эдгээр нөхцлүүд ховор ч, том судалгаагаар шинжилгээ хийлгэсэн хүмүүсийн 24 хувь нь дор хаяж нэг генийн мутаци тээдэг болох нь тогтоогдсон. Генетикийн зөвлөхтэй ярилцсанаар үр тогтголт болон хүүхэд төрүүлэх сонголтуудаа илүү сайн ойлгох боломжтой.

Тогтмол бэлгийн харилцаа

Хэрвээ жирэмслэхээр бэлтгэж байгаа бол дараах зөвлөмжүүдийг анхаараарай.  Жирэмслэх хамгийн өндөр магадлалтай нь өдөр бүр эсвэл өдөр бүрийн аль нэг өдөр бэлгийн харилцаанд орох явдал байдаг. Гэхдээ заавал ийм их давтамжтай байх шаардлагагүй: сарын тэмдэг дууссаны дараах 2–3 өдрийн хооронд бэлгийн харилцаа хийх нь үр дүнтэй. Эмэгтэйн бие дотор үр тогтоох чадвартай сперм 72 цаг амьдрах боломжтой тул өндгөвчөөс өндгөн эс гарсны өмнөх 3 өдрийн хугацаанд сперм бэлэн байна.

Өөрийгөө арчил

Сэтгэл санаа болон биеийн эрүүл мэнддээ анхаарвал бусдыг ч илүү сайн асрах боломжтой. Жирэмслэлтэд дэмжлэг үзүүлэх хоол хүнс идэх, сайн унтах, дасгал хийх, стрессээ удирдах зэрэг арчилгааг эхлүүлээрэй. Массаж, йога, амьсгалын дасгал хийх нь стрессыг бууруулж, жирэмслэх болон эрүүл жирэмслэлтэд тусална.

Биеэ жирэмслэлтэд бэлд

Биеийн гол булчинг хүчтэй байлгах нь жирэмслэлтийн үед болон төрсний дараах сэргэлтэд тустай. Гол булчин хүчтэй байх нь нурууны асуудлыг багасгаж, төрсний дараах сэргэлтийг хурдан болгодог. Жингийн дасгал болон йога хийх нь хамгийн тохиромжтой.

Юунаас зайлсхийх вэ гэдгийг мэд

Жирэмслэхийг оролдож байгаа болон  жирэмсэн болсон үед тамхи, мансууруулах бодис, хууль бус бодис, архи болон хэт их кофеин хэрэглэхээс зайлсхийх хэрэгтэй.